అజం నిర్వికల్పం నిరాకారమేకం
నిరానందమానందమద్వైతపూర్ణం |
పరం నిర్గుణం నిర్విశేషం నిరీహం
పరబ్రహ్మరూపం గణేశం భజేమ ||
గుణాతీతమానం చిదానందరూపం
చిదాభాసకం సర్వగం జ్ఞానగమ్యం |
మునిధ్యేయమాకాశరూపం పరేశం
పరబ్రహ్మరూపం గణేశం భజేమ ||
జగత్కారణం కారణజ్ఞానరూపం
సురాదిం సుఖాదిం గుణేశం గణేశం |
జగద్వ్యాపినం విశ్వవంద్యం సురేశం
పరబ్రహ్మరూపం గణేశం భజేమ ||
రజోయోగతో బ్రహ్మరూపం శ్రుతిజ్ఞం
సదా కార్యసక్‍తం హృదాచింత్యరూపం |
జగత్కారణం సర్వవిద్యానిదానం
పరబ్రహ్మరూపం గణేశం నతాః స్మః ||
సదా సత్యయోగ్యం ముదా క్రీడమాన
సురారీన్ హరంతం జగత్పాలయంతం |
అనేకావతారం నిజజ్ఞానహారం
సదా విశ్వరూపం గణేశం నమామః ||
తమోయోగినం రుద్రరూపం త్రినేత్రం
జగద్ధారకం తారకం జ్ఞానహేతుం |
అనేకాగమైః స్వం జనం బోధయంతం
సదా సర్వరూపం గణేశం నమామః ||
తమః స్తోమహారం జనాజ్ఞానహారం
త్రయీవేదసారం పరబ్రహ్మసారం |
మునిజ్ఞానకారం విదూరే వికారం
సదా బ్రహ్మరూపం గణేశం నమామః ||
నిజైరోషధీస్తర్పయంతం కరాద్యైః
సురౌఘాంకలాభిః సుధాస్రావిణీభిః |
దినేశాంశుసంతాపహారం ద్విజేశం
శశాంకస్వరూపం గణేశం నమామః ||
ప్రకాశస్వరూపం నభో వాయురూపం
వికారాదిహేతుం కలాధారరూపం |
అనేకక్రియానేకశక్తిస్వరూపం
సదా శక్తిరూపం గణేశం నమామః ||
ప్రధానస్వరూపం మహత్తత్త్వరూపం
ధరాచారిరూపం దిగీశాదిరూపం |
అసత్సత్స్వరూపం జగద్ధేతురూపం
సదా విశ్వరూపం గణేశం నతాః స్మః ||
త్వదీయే మనః స్థాపయేదంఘ్రియుగ్మే
జనో విఘ్నసంఘాతపీడాం లభేత |
లసత్సూర్యబింబే విశాలే స్థితోऽయం
జనో ధ్వాంతపీడాం కథం వా లభేత ||
వయం భ్రామితాః సర్వథాజ్ఞానయోగా
దలబ్ధాస్తవాంఘ్రిం బహూన్ వర్షపూగాం |
ఇదానీమవాప్తాస్తవైవ ప్రసాదాత్
ప్రపన్నాన్ సదా పాహి విశ్వంభరాద్య ||
ఏవం స్తుతో గణేశస్తు సంతుష్టోభూన్మహామునే |
కృపయా పరయోపేతోభిధాతుముపచక్రమే ||
ఇతి శ్రీమద్గర్గఋషికృతో గణపతిస్తవః సంపూర్ణః ||